అమర్‌నాథ్ యాత్రకు లైన్ క్లియర్.. యాత్రికుల భద్రతకు ‘ఆపరేషన్ శివ‘ ప్రారంభం

పవిత్ర అమర్‌నాథ్ యాత్రకు హాజరయ్యే యాత్రికుల భద్రత దృష్ట్యా జమ్మూకశ్మీర్ ప్రభుత్వం కీలక నిర్ణయం తీసుకుంది. అమర్‌నాథ్ పుణ్యక్షేత్రానికి వెళ్లే అన్ని మార్గాలను జులై 1 నుంచి ఆగస్టు 10వ తేదీ వరకు ‘నో-ఫ్లయింగ్ జోన్’గా ప్రకటిస్తూ కేంద్రపాలిత ప్రాంత హోం శాఖ ఆదేశాలు జారీ చేసింది. ఈ కాలంలో డ్రోన్లు, బెలూన్లు, ఇతర విమానయాన సాధనాల వినియోగంపై పూర్తి నిషేధం విధించింది. 

ఈ ఏడాది అమర్‌నాథ్ యాత్ర జులై 3న ప్రారంభమై ఆగస్టు 8న ముగియనుంది. భద్రతా పరంగా అత్యంత సున్నితమైన ఈ యాత్ర నేపథ్యంలో ఇంటెలిజెన్స్ ఏజెన్సీల నుంచి తీవ్రవాద ముప్పు పొంచి ఉందన్న హెచ్చరికలు అందాయి. ముఖ్యంగా ఏప్రిల్ 22న పహల్గామ్‌లోని బైసరన్ మైదానంలో జరిగిన ఉగ్రదాడి, మే నెలలో భారత్-పాకిస్థాన్ మధ్య తలెత్తిన నాలుగు రోజుల సాయుధ ఘర్షణల అనంతరం ఉద్రిక్తతలు పెరిగిన నేపథ్యంలో ఈ నిర్ణయం తీసుకున్నట్టు భద్రతా వర్గాలు వెల్లడించాయి. 

యాత్రికుల భద్రతను మరింత పటిష్టం చేసేందుకు భద్రతా దళాలు ‘ఆపరేషన్ శివ’ను ప్రారంభించాయి. పహల్గామ్, బల్తాల్ మార్గాల్లో యాత్రికులకు రక్షణ కల్పించడమే ఈ ఆపరేషన్ ముఖ్య ఉద్దేశం. ఇందులో భాగంగా సుమారు 50,000 మంది పారామిలటరీ సిబ్బంది, జమ్మూకశ్మీర్ పోలీసులతో కలిసి యాత్ర మార్గాల్లో ప్రతిరోజూ రోడ్ ఓపెనింగ్ ఆపరేషన్లు నిర్వహిస్తారు. మార్గమధ్యంలో పేలుడు పదార్థాలు, ఇంప్రొవైజ్డ్ ఎక్స్‌ప్లోజివ్ డివైజ్‌లు (ఐఈడీలు) ఏవైనా ఉంటే గుర్తించి నిర్వీర్యం చేస్తారు.

ఈ ఏడాది తొలిసారిగా యాత్రికుల కాన్వాయ్ కదలికల సమయంలో రక్షణగా జామర్లను కూడా మోహరించనున్నారు. ఇప్పటికే భద్రతా దళాలు నిర్దేశిత యాత్రా మార్గాలను తమ ఆధీనంలోకి తీసుకున్నాయి. కేంద్రపాలిత ప్రాంతం అంతటా అదనపు బలగాలను కూడా మోహరించారు. బహుళ అంచెల భద్రతా వ్యూహం, జామర్లు, మానవరహిత విమాన వాహనాల (యూఏవీలు)పై ఆంక్షలు వంటి సాంకేతిక చర్యలతో ప్రతి సంవత్సరం హిమాలయ పుణ్యక్షేత్రానికి తరలివచ్చే వేలాది మంది యాత్రికుల భద్రత మరింత పటిష్టమవుతుందని అధికారులు విశ్వాసం వ్యక్తం చేస్తున్నారు.